Mabhindauko
Wasara-Wasara Savings Club
Vagari vekumaruwa ekwaSeke, varikuita mukando vachibatsirwa neSelf Help Development Foundation, SHDF.
Veboka reWasara Wasara kwaZhangira, KwaSeke varikufara zvikuru nekuti varikuwana rusununguko panyaya dzehupfumi. Vazhinji vanoshandisa mari pakurima nekuronga zvepamusha. Madzimai akabvunzwa akati kuita mari yavo kunovapa chiremerera zvichibva zvaderedza mhirizhonga mudzimba.
Lucia Nhapi ane makore makumi mana nemaviri, 42 aive nhengo yemukando weWasara Wasara kubva mugore ra2015, anoti, “Ndinobatsirikana zvikuru, nemari yandinowana kumukando, ndinoishandisa kutenga mbeu nezvekurimisa. Kuita mari kunoderedzawo mhirizhonga mumba mangu.”
Muchaneta Mushonga
Muchaneta Mushonga, ane makore makumi mana nemasere(48) wekwaZhangira kwaSeke mudzimai akazvimirira panyaya dzeupfumi. Anoti anobatsirwa neboka reSelf Help Development Foundation, SHDF kuburikidza nemukando nemastudy cycle.
Mai Mushonga vanoti,“Ndinowana ruzivo rwezvekurima kubva kuboka reSHDF kuburikidza nemaStudy Circle nemukando. Ndinochengeta huku, mombe nembuzi nekurima mbesa. Ndinokohwa pakuru gore negore nekuti ndinodzidza kubva kuSHDF.”
Chikomborero Gutsa
Makore apfuura, Chikomborero Gutsa, mudzimai ane makore makumi mana nemanomwe (47) akaroorwa ane vana vatanhatu, akaruka zano rekuita naro mari iri muzita rake semunhukadzi asi ichizobatsira mhuri yake.
Mai Gutsa vakabatsirwa neboka reSelf Help Development Fund, (SHDF). Sangano reSHDF raive nenyanzvi pakuronga-ronga nyaya dzekugadzira mari kuburikidza nemaSavings club kana mikando.
“VeSHDF vakandidzidzisa kuchengeta mari nekuita mabasa emaoko. Ndiri kugadzira upfu hwebota, uho ndinogadzira nechibage, mhunga, mupunga, nzungu nesoya beans. Bota iri rinodiwa zvikuru munyika nekunze, asi pane dambudziko. Upfu uhu hunofanira kuongororwa nevebazi reMinistry of Health asi zvinoda mari. Kuri kudiwa $250, ndikaibhadhara zvinondivhurira mukana wekuita hupfumi.”
Gladmore Chikoto
Baba Gladmore Chikoto, 35 vekwaChanakira, Seke vane mhuri yevana vatanhatu vanoti havana kumbobvira vakashanda pamurungu kubvira pavakabva kuchikoro. Chikoto akatanga kuita musika paMakoni panzvimbo yekutengesera huru muChitungwiza mugore ra2004. Akatanga achiri jaha.
“Ndakatanga kutengesa muna 2004 paMakoni ndiine musika wangu wezvirimwa. Musika waifamba asi ndakazocherechedza kuti ndairuza nekuti zvirimwa zvaidhura, ndakabva ndafunga kutanga kuzvirimira ndichiunza zvirimwa kumusika. Ndakatanga izvi muna 2012 ndava nemunhu ainditengesera kumusika ini ndichinyanyisa kuita zvekurima. Zvakatanga kufamba zvikuru. Ndakabatsirwa neboka reSHDF nemazano kuti ndibudirire,” akadaro Chikoto.
Ndakafara kuvemudzimai akazvimiririra panyaya dzehupfumi , handina kuda kutama musha wangu kundogara kumba itsva kudhorobha. Ndakaisa maroja, izvozvi kubva muna2004 ndinowana mari yerendi. Mari yangu iri kuwanda nekuti ndinochengeta huku.