Dzandura village projects: Ellen Kaminyu

Mai Ellen Kaminyu vane makore makumi mashanu, 50 vachigara kwaDzandura , kwaSeke vakabatsirikana nezvirongwa zveSelf Help Development Foundation, SHDF. “Ndinotenda kuneveSHDF,ndakakwanisa kuwana zvese zvandainazvo kuburikidza nerubatsiro rweboka iri.”

Kaminyu ane vana vana, inhengo izere yeSHDF kubva muna1992. Akatanga nekukanda 20c pavhiki mumukando weSHDF. Mari yaiwanikwa yairamba ichiberekana, nekupindana kwemazuva yozogoveranwa mushure memwedzi mitanhatu. Imwe yaikweretesanwa ichidzoka yabereka. Kwapera mwedzi mitanhatu yaizodzoka yaberekana.”

Amai ava vakakwanisa kuchengeta huku nemari yakabva kumukando. Vakakwanisa kuzotenga imba inemakamuri masere kuTafara mudhorobha reHarare. Havana  kuda kugara kudhorobha vachisarudza kuchengetedza musha wavo.

“Ndakafara kuvemudzimai  akazvimiririra panyaya dzehupfumi , handina kuda kutama musha wangu kundogara kumba itsva kudhorobha. Ndakaisa maroja, izvozvi kubva muna2004 ndinowana mari yerendi. Mari yangu iri kuwanda nekuti ndinochengeta huku,” akadaro Kaminyu.