Self Help Development Foundation

Inhlanganiso yeSelf Help Development Foundation (SHDF) igxile kakhulu kwezokuthuthukisa umphakathi ikakhulu emaphandleni. Inhlanganiso le ihlose ukwakha kanye lokukhuthaza abesifazana ukuthi benelise ukuzimela kwezomnotho. ISHDF  yasungulwa ngomnyaka ka 1963 njalo iqhubekela phambili isenza imisebenzi esekela injongo yayo ukuze iqhubeke isenza lokho okuzaphathisa amalunga ayo kanye lendawo esebenzela kuzo.

ISHDF yinhlanganiso ejonge ukufundisa kanye lokuthuthukisa impilo zabantu. Inhlanganiso le ilobungcwethi, ubungcitshi kanye lolwazi kokutshiyeneyo okugoqela ulwazi lokusungula lokuqhutshwa kwamabhizimusi,  ukulawula kumbe ukuphatha amabhizimusi, indlela ezingasetshenziswa ngabalimi ukuqhuba amabhizimusi abo kanye lalabo abalamabhizimusi asakhasayo, ukuqoqwa kwezimali emabhizimusini asakhulayo, ukugcina imali kanye lokubolekisa imali, ukufundisa imisebenzi yezandla, lokweluleka kwezamabhizimusi okulima.  Ngaphandle kwalokho iSHDF  ilolwazi lokwenelisa ukusiza abantu abakhule ngendlela ezehlukeneyo njalo bedabuka endaweni ezitshiyeneyo.

Inhlanganiso le inika abantu abatshiyeneyo amaqhinga okusungula kanye lokuqhutshwa kwabhizimusi. Lababantu bagoqela abalimi abasakhulayo, inhlanganiso zabalimi, inhlanganiso ezibona ngokuphathwa kwempahla, amaqembu kanye lenhlanganiso zabesifazane, abaholi benhlelo ezitshiyeneyo, abathengisa ezokulima kanye lomphakathi jikelele.

ISHDF ilabantu abalobungcwethi abatholakala elizweni lonke jikelele lokhu kwenza senelise ukwenza inhlelo ezitshiyeneyo endaweni ezehlukeneyo ngasikhathi sinye.

Thina njengenhlanganiso siphatheka ekuthuthukiseni abesifazane kanye lomphakathi sikhuthaza ukuzimela kwabantu kwezentuthuko. Amalunga ethu angamatshumi aficaminwe mibili ekhulwini  (80%) atholakala emaphandleni  kuthi ke angamatshumi amabili ekhulwini (20%) atholakala emadolobheni.

Okwakhathesi sigxile kakhulu ekuthuthukiseni  ezokulima, sikhangele kakhulu indlela zokwengeza inotho etholakala ngokulima. Ukuze lokhu kufezeke sigxile kakhulu ekwakheni lekufundiseni labo abaphatheka kwezokulima abagoqela labo aabalima bethengisa izilimo zabo,  siyabeluleka, sibafundise kanye lokubaphathisa ngendlela zokuqoqa imali.

Ngaphandle kwalokho silezifundo zokwenza amabhizimusi ngobungcwethi esizifundisa abalimi ukuthi baphathe ukulima njengebhizimusi engabaphilisa, ukudingela abalimi imali ebolekiswayo, ukukhuthaza abantu indlela zokuphatha lokulungisa ukudla, ukuthengiswa kwalokho abayabe bekutholile,  ukumaketha labo abomisa izilimo zabo zesivandeni ezifana lemibhida lokunye okutshiyeneyo, kanye lezithelo ezingathengiselwa emamakethe ezabelweni.

Sisebenza ezigabeni zakuleli ezingamatshumi amathathu njalo silabaqeqetshi abafundisa abantu kokutshiyeneyo ezigabeni. Sitholakala ezigabeni ezithi ; Chimanimani, Mutare, Buhera, Mutasa, Makoni, Nyanga, Wedza, Mutoko, Murewa, Goromonzi, Manyame/Seke, Guruve, Maowe, Bindura, Hurungwe, Zhombe, Shurugwi, Mvuma, Gokwe North, Chivi, Masvingo, Gweru, Tsholotsho, Lupane, Nkayi, Umzingwane, Gwanda,Bulilima, Harare kanye lakoBulawayo.

Silohlelo olugxile kakhulu ekufundiseni umphakathi ngezobulili osolufundise kakhulu ngendaba eziphathelane labesilisa labesifazane lokuphatha ezemvelo lokwembiwayo kwendabu.

Sisebenza ndawonye lenhlanganiso okuthiwa yiMina Lawe/Ini Newe ekunikeni amandla kanye lekuthuthukiseni umphakathi. IMina Lawe/Ini Newe izenelisa ukufinyelela amalunga ethu kanye lokubona inhlelo esizenzayo elizweni lonke jikelele.  IMina Lawe/Ini Newe izaloba lokho okwenziwa ngamalunga ethu ukuze lololwazi lwenelise ukukhuthaza abanye abesifazane abasendaweni ezitshiyeneyo.

Amalunga ethu, amanye asemaphandleni lawo azathola ithuba lokuthi indaba zawo lemisebenzi yawo emihle ayenzayo  ekade ifihlakele ivezelwe umhlabawonke endabeni ngendlela ezindala kanye lezintsha ezokuvezwa kwezindaba.

Siyajabula kakhulu ngokusebenza lalinhlanganiso  iMina Lawe/Ini Newe yona engumthombo wokwabelana ulwazi, ukuphana amacebo kanye lokuxoxisana  kwabantu ngenhloso yokuphumelelisa umbono wokuthi abantu bathuthuke kwezomnotho, babelamandla okuzimela  lokuthi umphakathi  uhloniphe amalungelo abantu ikakhulu amalungelo abesifazane.

Benza imisebenzi elandelayo

• Ukuqoqa amaSelf Help groups (amaqembu okugcina imali)
• Ukufundisa imisebenzi yezandla emaqenjini okutshayelana imali.
• Ukuqoqa amaqembu okwenza izifundo kumastudy circle lokuhlolisisa ukwenziwa kwama study circles la.
• Ukuncedisa ukuqoqa abantu ezabelweni

A list of contact persons is available upon request for your area. Please use the contact form below for further information.

NB: Izifundo lezi zenziwa ngamalanga amabili kusiya kwamahlanu njalo kuya ngomuntu ukuthi uyabe efisa ukwenzani. Imali ehlawulwayo iyatshiyana kusiya ngokuthi  uyabe ekhethe ukwenza ziphi izifundo, njalo uyenelisa ukuthola ulwazi olugcweleyo ungaxhumana lathi. Silendawo yokufundela eyenela abantu abangamatshumi amahlanu kusiya kumatshumi ayisithupha. Lindawo iyabhadalwa kwabafuna ukuyisebenzisa.